منتديات غرباء العراق

اهلا بك عزيزي اذا كنت زائر فيشرفنا تسجيلك وانظمامك لعائلتنا اما اذا كنت عضو فتفضل بالدخول
منتديات غرباء العراق

منتدى لكل من يرغب بحياة المحبه والسلام والصداقه والاخوه والتعارف وووو كل شيء تتمنى ان تعيشه بحياتك

تصويت

هل ستحقق المظاهرات العراقيه اثاراَ على الحكومة
اشعار شعبي عراقي جميل وحزين وغرام وخيانه I_vote_rcap100%اشعار شعبي عراقي جميل وحزين وغرام وخيانه I_vote_lcap 100% [ 2 ]
اشعار شعبي عراقي جميل وحزين وغرام وخيانه I_vote_rcap0%اشعار شعبي عراقي جميل وحزين وغرام وخيانه I_vote_lcap 0% [ 0 ]
اشعار شعبي عراقي جميل وحزين وغرام وخيانه I_vote_rcap0%اشعار شعبي عراقي جميل وحزين وغرام وخيانه I_vote_lcap 0% [ 0 ]
اشعار شعبي عراقي جميل وحزين وغرام وخيانه I_vote_rcap0%اشعار شعبي عراقي جميل وحزين وغرام وخيانه I_vote_lcap 0% [ 0 ]

مجموع عدد الأصوات : 2

المواضيع الأخيرة

دخول

لقد نسيت كلمة السر

سحابة الكلمات الدلالية


    اشعار شعبي عراقي جميل وحزين وغرام وخيانه

    يوليوس قيصر
    يوليوس قيصر
    نائب المدير العام
    نائب المدير العام

    ذكر المواضيع : 115
    تاريخ الميلاد : 22/08/1990
    تاريخ التسجيل : 24/08/2009
    موقعك المفضل : https://ghrabaaliraq.yoo7.com

    اشعار شعبي عراقي جميل وحزين وغرام وخيانه Empty اشعار شعبي عراقي جميل وحزين وغرام وخيانه

    مُساهمة من طرف يوليوس قيصر في السبت أبريل 17, 2010 12:11 am

    متناسبني كًلي
    ساكت شرد اگلك
    هو ضل السان
    عندي وبيه اسولف واعترف معجب

    شفتك من بعيد
    وخذت كلشي وياك
    انه ادري اشراح تاخذ مني من تگرب
    ***
    ما مرتاب منك
    بس احس بخوف
    وبعيونك احس كل نضرة الك مطلب

    يبو عيون الصگر
    سابينه من مرتاح
    نطي وجوهنا لا وين من تغضب

    على كيفك وياي
    وشوفني بيا حال
    تعبني العشگ ما بي بعد اتعب

    يابس زرع روحي
    وضامة امن النار
    ونارك بالزرع شيكضها من تنشب

    ***
    تحيرني البرائه
    اشما افكر بيك
    ما اعرفك صدگ وياي لو تلعب

    الغريبة البيك توك
    ما تعرف الشوك
    وشلته حال گلبي البيك هي اغرب

    بسهل طبيت گلبي
    وما گلتلك وين
    يالشايل گلب للموت ما ينطب
    ***
    ما احبك بعدني
    وكلشي بيدك صار
    چا ..شيضل علي .. لو من ..صدگ تنحب

    ***
    مو مثل البشر
    لا عمي عشگك موت
    موت وشلي بيه ما منه كل مهرب

    انت الحلوة بيك
    اشگد صعب وياي
    وانه الحلوة بي وياك ما اصعب
    ***
    متناسبني گلي
    حتى اضل مرتاح
    متناسبني اشوفن هذا حل انسب

    ما احبك لان
    ما شفت هيچ اوصاف
    والگلك اوصفك نافق وچذب

    ***
    ملعب للجمال
    او وحدك اللاعوب
    وبحسنك صرت لاهل المثل مضرب

    وعيونك بيارغ
    هوست عالناس
    (((احنه الاسسنه الملعب واحنه النلعب بي)))
    واشحدة اليطب وباك للملعب

    ***
    تبين من بعيد
    اشما مشو وياك
    حجر هم وصرت من دونهم كهرب


    تسب الناس
    كل خطوة جدم عالگاع
    من تنسب اذا لتضوج من تنسب

    ****
    معقولة انت اكلك
    اكل هاي الناس
    ونفس الماي تشرب منه من تشرب

    گل لاهلك دخيلك
    خلهم يضموك
    انت الماكو منك خاف لا تخرب

    ومن يكثر المثلك
    خلهم يطلعوك
    بلكي تضيع لمن بالشبه تنذب

    ***
    لتخليني احبك
    بي الف فلاح
    يربات المدينة ارجوك لا تگرب

    طير القرية روحي
    يخاف الولايات
    السطوح تصيح بيه لو عالمدن يچهب

    طير القرية روحي
    وما يعرف هواي
    ومن كتر البيادر من يلكط حب


    احب كلك
    احب كلك
    خِلّك ما صرت لوما خليلي أتصير
    وصرت خِلّي برضاتك چي صرت خِلّك
    علّمتك عليّه من الألف للياء
    وتغلط بالا جابه
    وآنه أعدّلّك
    حرثت لخاطرك بالروح حرث الگاع
    بوسات أو ورد كل خلگي أشتلّك
    شمعة انته بحياتي
    أو عمري ظلمة ليل
    اشعلت روحي و خفت
    ما اشعللك ... أشعلك ... ؟؟

    خاف أسنين عمرك تحترگ بالشوگ
    أضمّلك گمت من عمري اعزلّك
    عليك اتسودنت مو بس أخاف اعليك
    احل روحي و اكضّك خايف تحلّك
    و اغمض من أشوفك و اخدر اعله الصوت
    غلطة انته بحياتي و صعبه ما ازلّك
    چم إبليس اطرد من يوزني اعليك
    و چم شيطان ارجمه أبروحي و اكتلّك
    ما صيرن نبي بس راهب آنه اوياك
    بآيات ألمحبه أبشوگ ارتّلّك
    شلّي بغيرك انته و ألگه مثلك وين
    و تتعب تلگه غيري بهلتعب شلّك
    ياهو ألعلمك و اتريد تمشي أبعيد
    سلّ الشوگ خايف باچر ايسلّك
    مثل ظلّك جنت
    * بالخطوة
    *نمشي اثنين
    و مشيت انته بظلام* و ضيّعت ظلّك
    دلّيني عليك أسنين تايه بيك
    و امشي وياي ادورك خاطر أندلك
    عرّفني اعله شخصك رايد احچي وياك
    بس كلمه و بعد ما غيرهه انكلك
    وحده ... من اثنين
    أو وحده راح اختار
    لو كلّك أحبّك
    لو أحب كلّك
    اسأل ليش احبك حته اگلك ليش
    وليش شما تسوّي وياي أقبلّك
    لحظة موت عمري اسنيني كلهن خوف
    بس اوياك أأمّن لمّن أوصلّك
    و انته آخر نفس واشگد عزيز أتصير
    و بلحظة الموت تريدنه انملّك ... ؟؟
    خيط عله الجرح باللحم صرت اوياي
    لو كلّ الجروح اتطيب ما افلّك
    تعرف كلشي بيّه و ما اعرف اشبيك
    لغز حلّك ، لغز ، من يگدر ايحلّك ... ؟
    أشرد حته اجيك و مدري ليش الخوف
    خاف تخاف مني بسدّك اختّلّك
    مثل ظلّك أظل و الليل يگضي الليل
    و من تطلع شمس من طولك أنزلّك




    منين اجيت

    الدنيا مو دنية عشگ يبن الحلال
    لا تخلينة بمحبتك ننجبر
    انت ابن العافية وابن الدلال
    واحنه ولد الموت ربانه الفقر
    بينه وبينك فرق كلش چبير
    وما نگول اسباب كل هذا الفرق
    وما نكمل السالفة الحد الاخير
    امن الاساس وياك مسدودة الطرق
    وياك ما نرهم وما ترهم محال
    ويانه ما تگدر تدوم وتستمر
    وباهو گلك بالسهل درب الوصال
    وانت تدري دروبنة مورثة جمر
    ***********
    ***********
    منين اجيت وبالعشگ عندك يقين
    منين اجيت وياهو سوالك درب
    انطيني مهلة وخل اشوفن وضعي زين
    وخل اشوف انوب هم اگدر احب
    گلبي تيهتا وشرد ما ادري وين
    وانه صار اسنين ما عندي گلب
    وخالي گلبك وانت بعيونك جمال
    كل جمال الكون يمك يعتذر
    نبع شفتك يعني كلماتك زلال
    والعطش بالروح تاركم جم فطر
    ******
    منين اجيبنلك خلگ يرهم عليك
    وانت اية امن الحسن واحلا الدلع
    وانه يا فرحة الاحطه ابين اديك
    وانه بچفوفي عمر شلت الوجع
    حتى ما عندي ابتسامة امنرد اجيك
    وليش تشلع گلبك بگلب انشلع
    وليش تطلع خاسر ومشلول حال
    وتترك الضحكة وعليمن تنقهر
    راجع افكارك بعد عندك مجال
    ليش بيه تريد گلبك ينكسر
    **********
    *********
    ادري بيك تحبني ما داعي الكلام
    وادري بدموعك صدگ تبچيلي
    من تجيني لا تكلمني بغرام
    عفية عوف الشوگ لا تحچيلي
    انه ليلي بلاية واهس ما انام
    اشلون لو صرت انت واهس ليلي
    واشلون لو حبيت شكلك والخصال
    واشلون لو باچر تروح وتعتذر
    هم ترد لمن اگللك تعال
    وتنتضر لمن اگلك انتضر
    **********
    **********
    احنه عدنه الحب يعني الحب عذاب
    ولازم امن ننحب نذب بالحب فلك
    ولازم نحب باب بيتك والتراب
    ونحب كلشي العايد وراجع الك
    ونحب ناسك كلها شيب اوية الشباب
    ولازم نحب كل عمامك وي هلك
    ولازم نحبك نحب الخال خال
    وكل هذني شوية لتگول اشكثر
    احنه ما عدنا العشك صفنة وخيال
    احنه من نحب نطگ وننفجر
    **********
    **********
    نخاف من حبك لان حبك جديد
    ذهب چنه وياهو اليشوفة انعجب
    والمشاعر (فقرة) (معضدها) حديد
    وانت يم (الفقرة) لا تطلع الذهب
    وياك ما نصقل بعد لا ما نعيد
    عوفنه ولتگول بينولي السبب
    احنه ما عدنه جواب لاي سوال
    لان من شفناك تيهنا الفكر
    هم شفت فد يوم گالو للدلال
    ليش متحملة حضن نار الجمر
    الدنية مو دنية عشگ يبن الحلال
    لا تخلينة بمحبتك ننجبر
    انت ابن العافية وابن الدلال
    واحنه ولد الموت ربانه الفقر



    ماتحبني
    ****
    بيني وبين نفسي
    اشگد افكر بيك
    واگول اشمعنى انت.. الشاغل اضنوني
    مو اول عشگ خاطر
    تشل الحال
    ولا اول جمال اتشوفك.. عيوني
    ****
    شجاها الروح
    يمك ذبت الاسرار
    وليش ارجف عليك ..وينخطف لوني
    وحتى الناس
    گامت تعرف بهل الحال
    وما اعرف.., شگلهم من يسألوني
    يطبون بصفنتي
    وعنك ايدورون
    ويلگوني افكر بيك... يلگوني
    ****
    وصاحت كلها صاحت
    هذا هذا فلان
    وما عندي لگوك.. وبيك تهموني
    **
    تهموني
    بمحبتك والله لو يدرون
    على ضيم العلي.. ايضل يواسوني
    ****
    ما يدرون عايفني
    بمهب الريح
    وانه وياك.. عفت الما يعوفوني
    ****
    يحبوني اشكثر
    والجيتي ايتانون
    واخجل من كثر ما گام... يتنوني
    وانت الما تحبني
    اشلون بالله وياك
    امرن بيك...، ما امر باليحبوني
    ****
    عفت الي شروني
    ومن ارد اشلون
    هم اسوة بعد... والنوب يشروني
    حبيتك شجاني
    وما حسبت احساب
    خيعونك علي... مو انة خيعوني
    ****
    متحبني.. واحبك..
    والمصيبة انوب
    اريدك وانهزم.. من اليريدون
    ****
    ومن دونك صرت
    ما اعيش وي الناس
    وانت بكل سعاده... تعيش من دوني
    باحزانك
    اودي دموعي تبچي وياك
    وبافراحك
    ابد ماتذكر اسنوني
    ****
    من سمعو اهلنة
    العشگ دگ الباب
    ما خلوك اهلك ...واهلي خلوني
    ما خلوك اهلك
    حگهم يخافون
    بس اهلي المحبتك ..شلع باعوني

    كون اتشوف
    كون اتشوف
    عفت كلشي ...وجبت كلشي

    ومدري شلون اجيت امشي ..

    اجيتك ردت اگلك شوف ...
    ردنه نعوف كلشي وماگدرنه نعوف

    كون اتشوف حالي اشگد الك ملهوف ؟..

    ******

    جبت كلشي اليسولف بيك
    خيالي وصحوتي وطيوف

    جبت دگات گلبي الگطعن گلبي بجفاك اسيوف

    جبت صفنات روحي

    السودنت روحي .....

    مثل جن بمسيه وعل يتيمه يحوف

    كون اتشوف ...........
    بشفافي الحزن ماخله بسمه تعيش

    وكلمن كمت ابوسه بخده اطبع اوف

    كون اتشوف ..........
    دموع الجدم مايدري وين يروح
    والخطوات عميه
    وتايه بلاشوف

    كون اتشوف ....

    ..خلصت الوجوه وشفت كل الناس
    كلها وجوه غربه ولا وجه معروف
    وين الگاك يلموصوف

    اليه أنه والك موصوف ؟...
    يلفرگاك غربه وكلشي مامألوف ...

    انه بلياك مدري شبيه مابيه ..

    زلف وبلايه ترچيه ...
    درب مابيه كل جيه...
    نهر فاض وتبع ميه
    رجع بس مالگاله اجروف
    كون اتشوف
    روحي شخله بيها الخوف
    مطلوبه نذر وتخاف ...

    ماتوصل حضرتك

    من بعيـــــــــــــــــــــــــــد طوف
    ******
    كون اتشوف
    روحي شخله بيها الخوف
    مثل دمم العروس الجايه اعله اجناب
    ويصبر عليهه
    وجابها الزافوف
    *****
    وشوف اشخله بي الخوف
    مثل حلت مدارس
    روحي احسها اطفال
    حلت وتركتني ...
    وباقي بس صفوف

    ******
    ويا وحشة صفوفي ومن يجيني الليل
    ويالون الوجه
    بعدك الضل مخطوف
    ***
    ويا قسوة ضنوني الماتريد ارتاح
    وانه الصاير اسير
    وبيدهن مجتوف

    ...
    كون الگاك واشكيلك
    على جروحي الگيت
    الغشمه بيها تروف
    وكون الگاك وابجيلك واسوي خدودي سبوره
    ودمعتي حروف

    وكون الگاك واحجيلك
    بكتاب السنين انحذف كلشي الچان
    بس اسمك لگيته الباقي مامحذوف

    واذكرك من مسحت دموعي
    باخر يوم على خدودي
    احس لهسه طبع اجفوف
    ******
    وكون اتشوف
    اعيوني مضيف تصير وكت النوم

    وهلبت بلحلم لنك
    تجينه ضيوف
    كون ا تشوف حالي
    شكد الك ملــــــــــــــــــــــــــــــــهــوف


    صفنة تماثيل
    اركض ما اطيح وبيه اشمت الگاع
    اومو آنه اليضل
    ياهو اليجي يفوته

    واركض بالعكس لوبيه دار الكون
    اصير آنه اليهد
    والناس مشحوتــه..!!
    واگول الموت عز وعيشة الأحرار
    موشغلة اماني…
    وكلمه مكبوتـــــــه
    وهنيالي من اموتن واخلص من الموت
    واشيل آنه
    انه واركض بتابوتـه…
    واصيرن خوف اخوّف وآنه عايش موت
    واشحده اليجيني
    واهجم بيوتــه…
    ميتين المگابر ما تشيل اسيـــــــــوف!!
    بس جيب اليطب
    بليل للموتــــه
    خليني اعله حالي وارضه اصيرن ليل
    ومن يدري..
    اشيظم الليل بسكوته؟!!
    * * * *
    مرات البشر بعيونه حجيه يصيـــــــر
    مو كل السوالف واضحه بصوته
    التماثيل بطبعهه
    الخرس والصفنــــات
    وتحچي اشگد معاني
    وهيه منحوته ..
    * * * *
    وبنادم چذب وبحلگه ميتْ الســــــان
    ياصدگ الچذب..
    والناس مبخوتــــه …
    يگلك عالگمر راح وخذاه الحوت
    ولا هو النزل لا صعدت الحوته





    صوت الشمس
    كلمن باصله يعمل لازم إيعلموه
    اهله اعله الوفه
    وبالصبر يتحلّه…
    * * * *
    ويگلوله الجفوف اطيح الفنجان
    ومن چف الجمر
    ماتوگع الدله…
    * * * *
    التگوده من اديه لتگله انه امدليك
    خاف ايمن عليك
    ايگوم يتبلــه
    * * * *
    اليگلك چنت لتسمعه لمن چان
    مومن الفعل
    من الحچي تمله!!
    سيفه البالحرب عصة متاع ايصير
    زحمه بين اخوته
    وبالشقه ايسله!!
    * * * *
    الحر حر الطبع لتغرك الأشكال
    وميذل العبد
    لو مارضع ذله…
    لدّور نزاهه بروح مثل ابليس
    اتگلبه اشماتگلبه
    بكل طرف خلّه
    * * * *
    تره الطيب گلب لوروحه دوله وجيش
    والله بكلمه طيبه
    بلحظه تحتــله!!
    * * * *
    وامشي اويَ اليحبك مثل ميماشيك
    وبلحظة غضب
    لا تحسب الزله..
    * * * *
    احسب باجرك لتگول بس اليوم
    اكَل الهذا هيچ
    وذاك ماكَلــه
    * * * *
    باچر بس ورق من يمشن الأقلام
    وتبقه شخله هذا..
    وهذا اله اشخله
    * * * *
    الماضاگ العنب بالعزه ماخسران
    وعمت عينه بمذله
    التارس السّلــه
    * * * *
    لاتركض عبث والحلم بالتكوين
    حلم الماوصــل
    لتروح توصلــه…
    * * * *
    واخلف شورهم گلهم خذيت الشور
    العقل من غير شورك
    غلــط تقبلّــه!!
    * * * *
    السمع صوت الشمس يندلها تطلع وين
    ودرب صوت الشمس
    عميــان تندلـــه
    * * * *
    ولتظل تلتفت مره اعله هذا وذاك
    وتشد لهذا راس
    وذاك اله اتفلــه
    * * * *
    يم باب الصبح لتاني يطلع نور
    لوتمشي بستر لو گوة
    تدخلّــــــه
    * * * *
    صوتك مو چذب لاتشتريله اجناح
    وبلسان الصدگ
    للغيم يتعلّــه…
    * * * *
    انته البيك واضح بس عقول الناس
    تريد ابچف غموض
    الواضح تحلـــه
    * * * *
    ظل انته اعله حالك هذا حالك دوم
    ضميرك بيه ملك
    واعليك يتولّــه
    * * * *
    والبروحه جبل ميهمه من اتصير
    تله وجوه رجله
    من امده التلــه
    * * * *
    والمخلص العمر خطواته بالصعبات
    ميتوسل شدد
    بالصعبه تسهلّه…
    * * * *
    الشمع لو يبقه طافي الظلمه ماتگضيه
    شعل راسه بضوه
    ويدري الضوه ايسلّه!!
    * * * *
    ولمن تشتعل لتگول بيه النــــــار
    واليسـألك اشلونك
    تدري شتگلــــه؟!
    * * * *
    گله اهنانه ضلي وآنه ظل هناك
    ونار اليشتعل
    متين بضلــه
    * * * *
    وانته اتعلمت من يوم عشر اسنين
    الوكت خيط المصايب
    وانته تغزلّـــــه…
    * * * *
    ولأن ضايگ تعبها وشايف اللوعات
    المصايب ماتهزك
    بيهه تتسلّــــه!!
    * * * *
    يالمعاشر اشد اثنين للأنســــــــــان
    اذا چلن عليــــه
    يگضن عليه كلـــه..
    * * * *
    العشگ كض الفقر سولف عليك هواي
    وگلّه اشگد تعب بس
    ماتـــرك خــله!!
    * * * *
    ذنبك ماعفتهم ذنبك العافـــــوك
    وانته بــلاذنب
    بس للذنب صلّه
    * * * *
    گلبك بيه حرب ميسكنه ياهو الچان
    ظـل بس الگدر
    والماگدر ولَـــه
    * * * *
    وجرحك مايفز الّه اعله صوت احباب
    واذا ماصح محب
    مايشتكي العلّه !!


    صوتـك
    صوتك ندهني او مو حلم
    وفزيت من نومي
    وگلت..
    مو صدگ لايمكن صدگ!!
    والروح وي صوتك مشت
    وناديت
    والخطوه ابعدت..
    والصوت وي مشي الجدم
    *من ينلحگ.. ما ينلحگ ..
    وعالأثر نمشي اعله الأثر..
    والشوگ سابگنه سبگ
    والگلب لم روحه واجه..
    ودگاته احسهه بلا وعي..
    مو مثل يوميه يـــدگ !!
    * * * *
    ويم بابك وياحيرتي .... مدري اشندهني وجابني؟!!
    وحتى نسيت اشلون
    عالباب من ادگ؟!
    * * * *
    ظنيت ما اشوفك بعد
    من شفت ضويات الدرب
    يطفونهه شما تعتلگ
    * * * *
    ومن شفت شتلات الفرح.. مات الفرح
    ومثلمه
    والحزن صار اسنين ياكل بالعــــــــرگ
    ****
    ورادوني مااشوفك ابد.. ضمو تصاويرك علي
    واعلنو لازم نفـــترگ
    * * * *
    وشالوك حتى من الحلم!!
    وحلمك يجيني بلا صور
    وبـلا خلـــگ
    ****
    ولمن افز.. يبجي الحلم..
    واثنينه اعله الروس نتگابل ندگ
    ورادوني مااشوفك ابد.. والعين مثل ام الولد..
    وانته الولد
    لمن اجت ..ماشافتك ..الجفن صار الزيج
    گامت بيه تشگ
    وياحال من بعدك عشت.. غصن وخذوني من الشجر
    وذبوني يم نار الهجر..
    واليوم باجر احترگ!!
    * * * *
    وعشت بطرگ
    روحي وسوادين العشگ
    واسأل عليك وتيهت… واسأل منو ..
    وبيمن اثق؟!!
    * * * *
    وانسدن بوجهي احس كل الطرق..
    والگه الأسأله وكيفت
    والگاهن الجلمات ويضيع الحلـگ
    * * * *
    وخلني اسولفلك بعد.. ياواهسي وغيرك منو؟
    والروح اجت مسودنه..
    واشبگهه وي روحك شبگ
    * * * *
    لاتبچي اطيح ويه الدمع ..والروح اسويها نفس
    ومناشغ اشهگني شهگ
    * * * *
    وبريتك يا ريتي ولمن اصيرلك نفس
    لاخنگك ولا
    اختنـــگ…!!



    باجر انسـه
    اگلهن راح خلي انسجله غياب
    اقنع الروح
    شيقنع النواظر؟!!
    * * * *
    اذا لساع وجهك حاضن العين
    شيشلعك نضر..
    بالعين صاير
    * * * *
    اسوي الصفنه صف واطبگ الباب
    واسجلك غايب
    بدرس المشاعر
    ومن تخلص صفنتي وافتح الباب
    عله عتبة صفنتي
    الگاك حاضـر!!
    * * * *
    موسهله عليّ واتعلم بساع
    وعله افراگك اصير
    بسـاع شاطـر!!
    * * * *
    جرح بس اشمعزتك بين الجروح
    خاطر لاتذل
    ضلّيت اكابر …
    * * * *
    گمت كل يوم اگولن باجر انساك
    ويجي باجر …
    واگولن گلت باجر
    * * * *


    نذرنالك
    ايام البعد جبناهه صفنــــات
    بيــــن آمالنه
    وحيرت امرنه
    تجي لوما تجي گضينا الأيام
    وصرنه وياهو يدري
    شلون صرنه؟!!
    صبرنه متاع صار وبعدك بعيد
    وتجوع ايامنا
    وتآكل صبرنه ..
    شبعد يالماتمر مو كافي الغياب
    وصار اهواي ننتظرك تمرنه …
    ونذرنالك تجي وندعيلك اتعود
    وعمت سچينه
    وشيب نذرنــــه
    وعلى غيرك چذب ماترهم الروح
    ومن غيرك يسد حاجة نظرنــه
    يابن الناس غيرك…
    ماكو موضوع…
    وهلبت بالچذب شخصك ذكرنه
    نسولف بيك…
    لآخر لحظه بالليل
    وترد من الصبح تشغل فكرنـــه
    ماعنت عليك
    بساعة غروب…
    روحك واشتهت تسمع خبرنـــه
    ياروح الگلب
    ياعزة الروح…
    يادمعاتنه وهمنه وسهـــــــرنـــه
    يااول عهد…
    ياتالي الأيــــــام
    يلعب اصبانه ياشيبة كبرنـــــــه
    اشگد گبلك مشو
    ما سلو الروح
    ولابغيابهم كســــــرو ظهرنـــه
    البعد نيران كبره…
    ايبخر الدموع
    وبس ايزود يتبخر بصرنـــــه
    منين انجيب مثلك
    حتى ننساك!!
    ومنو المثلك يعوضك لوخسرنه
    الشبه كل اربعين ..
    احچايه تنگال
    واذا واحد يصح جان انتظرنه
    تعال الجرح..
    جن ومارضه يهيد!!
    وحچينه وياه ماينفع عذرنـــــه
    يشگ روحه اعله
    طوله وينكت جروح …
    وگضينه اخيوطنه وملت ابرنه
    شوكت يندگ علينه
    ويضحك الباب…
    ويترس بيتنه وصوتك يسرنه
    وترد انته ويجن
    الراحن وياك…
    وتجيبه وياك يا لماخذعمرنه


    طين حري
    تعال امسح ادموعك وارسم افراح على اعيونك وخدك والشفايف
    ومعليك بحزن ذيچ المواضيع وراح اختارلك احلا السوالف
    واعرفني وبعد لا تعرف الناس وانه وياك انساها الطوايف
    ومعلينه بعد بالرايح وجاي ومعلينه ولو بس ابقه خايف
    اخاف اعليك من عين اليحسدوك ومن اعيون تجار العواطف
    يا بو اشراع الترف يمهجج الريح اضمك وين من عين العواصف
    تعال بروحي ابدلك شلي بالروح اجازف بيه وبيك وما اجازف
    اشگد شايف عشگ واحبابنه هواي بس مثلك عشگ صدگ مشايف
    درب تفكيري كثره البيه يمرون ولگيتك بالدرب بس انت واگف
    وشغلت الفكر كله وصرت موضوع وانت بهل الامر ما انته عارف
    وگلت لل روح احبك والگلب گال ما كو اشكال عدنه وما يخالف
    وانه الصادگ بحبك واحلفت بيك بطولك بالوجه بالعشگ حالف
    وميلادك محبتك صارت اليوم يضل كل يوم ميلادك يصادف
    يابو نضرة التكتل انت معذور اذا تكتل بشر لتگول اسف
    سر بيك وعجيب وثگلك البيك عليك من الجمال هواي ضايف
    نهر حسنك يروي اوجوه الاحزان خذن منه اشكثر ما صار ناشف
    الغبشه عيون وجهك طلعتك خير المشرق شوفتك والوكت كاشف
    لحن صوتك لحن كل العصافير وميعزفه ابد هيهات عازف
    وجرح البيك جن جرح الرياحين كل ما تنلجم بالعطر نازف
    وگلبك طين حري وشيمته الگاع وشايل طيب كل ذيچ الصرايف
    ومثل گلبك گلبنه وشوفنه اشلون نضحي بكلشي الك لمن نوالف



    لا تخجل
    سولف گول الك واهس تضل وياي
    واذا ما الك واهس گول لا تخجل
    ما اقبل احبك وانت ما مرتاح
    وما ارتاح احبك وانت ما تقبل
    اذا متشدني بيك وبيه اشدك حيل
    انحل بالسهل من عندك وتنحل
    بكيفك من اجيت وما جبرتك يوم
    وما اجبرك بكيفك لو ردت ترحل
    فكر باليهمك والمهم شتريد
    انه كل اليهمني المهم لا تزعل
    ما مليت منك اگدر ابقه وياك
    بس المشكله خاف انه راح انمل
    ميهمني الدرب صار امشي بيه اسنين
    ما اندل چنت بس هسه گمت اندل
    وما اگولن خساره الراح مني وياك
    وي كلمن تحبه الروح ما تبخل
    روحي الحبتك تتحمل بلياك
    وما ينقص صبره بغيبتك يكمل
    مجنونه نعم بس تدري روحي اشلون
    تنجن بالعشگ وبلا عشگ تعقل
    حبيتك صدگ والوكت چذبه هواي
    وبمعركته الدغش انه انزلت اعزل
    وتعرفني ولو عندك شكوك هواي
    وادري لك شكوكك چان عندك حل
    من شفتك سنابل روحي اجت ترويك
    ماي ولا تضن اتصيلك منجل



    الليلة صوتك
    مو مثل صوتك هذاك
    بي برائة وعاطفة.. ونبرة طفل
    الليلة روحك
    جاية ادور امان
    وخايف اعلة اسرار.. گلبك تنسأل
    ***
    هاي بيبان الگلب
    مفتوحة ليك
    ومن سمعنة اسمك.. تكسر كل قفل
    ليش متردد زرع حبك
    يريد
    من زمان ابگاعنة.. بحب ينشتل
    ***
    ومن زمان اعيونة
    ادور ضواك
    رمد شوف الناس.. بس شوفك كحل
    شوف وجهك
    شمس واتضوي الدروب
    والتمر من يمة طبعا.. ينذهل
    ***
    منشغل بيك اعترف
    چنك ملاك
    ومنهو غيرك يستحق.. بيه انشغل
    ومن اعوفك انكتل
    واخسر هواك
    ومن اضل وياك.. هم راح انكتل
    انكتل بيك
    بسبب حسنك عجيب
    والعجيبة بگلبي.. ما غيرك يحل
    ***
    ما املك
    يا حلم ما ادري ليش
    اشما تمر بالعين.. منك ما تمل
    اشما كبرت بعين
    تزغر
    والسنين
    يصيرن باول عمر.. لمن تهل
    ***
    يبو عگد الثالث
    ازغير وچبير
    وانت بين اثنينهن... نفس الشكل
    اسنينك العقلك
    اذا گالو چبير
    وروحك ازغيرة.. يبو اچبير العقل
    ***
    بعد روحك
    تركض بنص الجهال
    وتلعب وياهم.. لعب.. جر.. الحبل
    يا بو وجنات الورد
    ما مر صباك
    لون ذابل.. چان عافاك النحل
    بعد عطرك ما خلص
    توة الربيع
    يناغم بعمرك.. يريدك تكتمل
    ***
    انزع اسنينك
    اذا كبرن عليك
    بعدك ازغير وكبر.. ما تحتمل
    عالگمر منگول
    عمرة اشگد چبير
    انگلة ابن اربع طعش. كل ,ما يهل
    والشمس اكبر بعد
    واكثر اكيد
    ومن عمرها الشمس,, شو ما تنفعل
    وانت احلا امن الگمر
    وازغر اكيد
    والشمس لو عدها عمرك... تحتفل

    خذني يمك بعد ماضل
    كل عذر لاتعتذر
    ليل عمري وعمرك مخلص بعد مابيه صبر

    خل نلم احلامنه وناخذ صورهن قبل لاياخذهن ابدربه الفجر

    وخل نلم الباقيات سنيني وسنينك نسويهن عمر

    وهنه ميكفن عمر؟؟

    ونبدي من جده وجديد بواهس سنين الصغر

    ولو وازانه الكبر

    خل تمشي ايامنه بخطوة العاقل من عثر مره ورجع يمشي حذر

    وخل نعيش الحب ستر

    خل نظم ارواحنه ابيناتنه وي اسرارنه وما نشتهر

    وأفتخر بيه وي روحك وآني وي روحي اضل بيك افتخر

    خل نسوي العشره ورقه

    ونصنع من الدمعه والضحكه حبر

    حتى كل لحظه التمر بالجاي نكتبها شعر

    وخل نكول الماضي غلطه وذنب يسجل ذنب من ينذكر

    حبني لاتضل تعتذر

    حبني واجبرني على حبك؟ الروح ماتعشك لون ماتنجبر

    السيف ماينهاب لوماكو الطبر

    حبني لاتضل تعتذر

    واعترف راح اعترفلك

    واحنه شو نفس الامر!!
    اثنينه انبعنه بسعر جوه السعر

    اثنينه انبكنه حدر شمس الظهر

    اثنينه السجين تانتنه نذر

    اثنينه اتوهمنه بالحب ننتصر

    اثنينه انعاني الغدر

    واعترف راح اعترفلك

    كلبي جان شكد جسر

    وآنه جتفت الجسر

    وآنه وزيت الحمامه على النسر

    واسمع السر الخطر

    صنم؟ سويته ابديه وادري ماينفع يظر!
    وحاطه كبالي وعجيبه الشوك

    من عنده انتظر

    وانته مثلي بهل أمر

    صنم سويته بديك شتنتظر

    خل نهدم اصنامنه وكافي الكفر

    وبالكي نهده ونستقر

    وبلكت وياك وانه وياي استمر

    وبلكت المامر كبل هسه يمر

    وبلكت جناح العشك لبعيد ياخذنه ويفر

    ونترك الممنوع والميصير

    خل نغط بلماي من صرنه جمر

    وبلكي نصحه من السكر

    خذني يمك كبل لايخلص صبرنه

    ويطفه دم وجوهنه وتطلع صفر

    خذني يمك كبل لاينحك ذهبها اطباعنه وتطلع صفر

    خذني يمك كبل لا يم الصفر ينحط صفر

    ______________________________________

    ممنوع همس الشفَه
    ممنوع بالحب رجفه
    وذبلة خدود الترفه
    ابغداد ممنوع العشك.
    نسكت كلبنه يحترك؟
    ممنوع ان نحجي الصدك
    كدامي اخرس ماحجه اشر وكصوا جفه
    ممنوع الياشر ...صدك؟؟؟؟؟
    وزعو موت اعله الخلك
    خفنه ورجعنه ليوره
    وجبرونه ان نلزم سره
    الكدام يسال بالوره
    شنهي الحصل ؟؟شنهي الجره؟؟
    ثاري مثل موت النخل واحدنه ميت وكفه
    وهم كلنه باجر تصفه؟؟؟؟
    عالغصن حيه مزيفه
    العصفور طير شعرفه
    سد عشه للنخله صعد
    كضته سنون السعفه؟؟؟
    وقرروا في جذع النخل ممنوع ترجف سعفه
    وممنوع تنبت سعفه
    ولو وحده رجفت من غضب او صدفه ولادنه سبب
    يكصون راس الصدفه؟؟
    بكل ذره من جسمي تعب
    بكل غرفه من بيتي حرب
    ينكلون اخوتي بهالحطب؟؟؟؟
    ويدعون بسلا تطفه
    وهم كلت باجر تصفه
    انعيش في نفس القفص
    بس اني وامي وجدي
    القفص يسوه مملكه
    وامي احسهه الملكه
    وجدي امتداد الكل ملك
    بس احس روحي مجدي؟؟؟؟؟شهبندر وماعندي
    الكلب ....ابن كلب النفط؟؟؟كلهم كلبهم ضدي
    امي وابوي وجدي
    وهم كلت باجر تصفه
    القفص جان بغرفه
    بعت القفص والغرفه ومابعت امي وجدي
    الرايح ايكل للراجع
    قنبله براس الشارع
    والناس كلهه تباوع
    من طكت بعيني شفت
    مكطوع راس الشارع
    ومحد يوكف نزفه
    وانسه القفص وانسه السجن
    وينزف على خدودي وطن
    من اسمع غنه داخل حسن
    واتمنه بيدي الدفه
    وانكسر مثل الكزاز
    من احلم بقنينه غاز؟؟؟؟
    اتشضه مثل الكزاز
    من احلم بروحي سفير
    وعمري ماشايف جواز؟؟
    ومرعوب افز من الحلم
    من خوفي بطلت اغفه
    وحبيت لاكن حاير...بنيه بشكل ماصاير
    بس بيتهم عالساتر؟؟؟
    والغام.....بيني وبينهه
    لاكن من اذكر عينهه
    والحصل بيني وبينهه؟؟؟؟؟؟؟؟؟؟
    تابوت احط للزفه
    وترجع بديه الدفه
    وشفه احط عالشفه
    وترجع خدود الترفه
    ومسموح همس الشفه
    ومسموح بالحب رجفه
    وكل الي كلته الكم....جذب ؟؟؟
    شاعر مسودن من احب
    ابغداد مسموح العشك
    ابغداد ....بس احنه الصدك
    وغصبا عللى الكل تصفه
    غصبا على الكل تصفه



    أوصافك لكل المعاني شامله وكليه
    وشوفتك هوا وشرب ماي وأكل ليه
    ماضمت مثل حسنك لا معهد وكليه
    لا علوم ولا هندسه ولا زراعه وتربيه
    وأحس انك من اوتار كلبي وتر بيه
    صعب ينجمعن سوا علم جمال وتربيه
    بس انت اوصافك لكل المحاسن جامعه
    وجمالك من اجا لك الخلق جا معه
    ولا حوت مثل رسمك كل الجامعه
    وانا اعرف الصياد من يصيد صيده له
    بس انه لمن أصطاد صيده صيدي له
    هواي شفت عيون بالآثار وصيدله
    بس ماشفت مثلك يابوقسم المحاسبه
    حاسب لكل حساب بس حسابي وياك موحاسبه
    حسابي وياك يحتاج كمبيوتر مو حاسبه
    لان نظرت عيونك اصعب من علم ذره
    محد مثلي يحبك من وزن الجبل ذره
    ذريت عمري الك ياهو الي إلك ذره؟
    ولوحجيت وياك بالأخلاق أحجي والآداب
    ولا اذكر لغيرك سار جدمي ولا داب
    ولا لمحت ألك شبه بالحاسبات والآداب
    وتلاكينا وجه بوجه ماصدوجهه ولاداره
    ولا غيره محب ملك كلبي ولا داره
    ماكو مثل خصرك بالرياضه ولا اداره
    ولا علوم وتمريض ولاقانون ولا طب
    ولا شميت مثل عطرك مسك ولاطيب
    ولو مرضت العلاج مايشفيي ولاطيب
    الا بلمسه منك اشفى وترد بيه الحياة
    وبدونك ابد ما أحس الها طعم الحياه
    مثل شفتك ماشفت بكل علوم الحياة
    ولا مر الك شبيه بسنتر ولا نادي
    ولغيرك ابد مايعلى صوتي ولانادي
    ولامنتخب مثلك اشجعه ولانادي
    ولا عندي مثل حبك هوايه ولارياضه
    والكون لاجنانه بيها مثلك ولارياضه
    ولا التقانات تحوي شبهك ولارياضه
    والتكنلوجيه ماحوت شخصك لامعاهد
    الزمن عهد حب بس مثل حبنا لامعاهد
    وعاهدك بس انته وغيرك لا معاهد
    وأعاهدك بلا حلف ويمين ولا أقسام
    يلتصوب بعينك بلا رشاش ولاأقسام
    محبتي الك ماهي قسم ولأاقسام
    محبتي الك يابعد الروح كليه







    كلهه ارهم لجن وياك بس مرهم
    يلبسمار حسنك نبت بعداك بسمرهم
    متنطرينك تجي وتتعدة بس مرهم
    مر شوف شنهو الحصل كسر بجمع كل هلك
    ياليمك انته انتهت روحي وصفت كلهه الك
    فدوة آنه اروحن الك وي كل هلي وكل هلك
    بس كون اعرفك تحب شخصي وردت وصله
    لاسحك جمر فركتك واجوي الكلب واصله
    اعترف دربك صعب هاك الكلب وصله
    وان جان ماتاخذه بس عالدرب وجهه
    وانته ادره بيه الوكت نار الهجر وجهه
    لاتنتظرني انتخي وكتي الكلب وجهه
    ومتصرفن اعله الكلب وبنصه هم بس مله
    ولا منه شفت الفرح لاني الشفت بسمه اله
    منه استعيذ ولذت من عنده بالبسمله
    بسم الله من دنيتي بس من بعد لاصفة
    لن حاربتني وصرت لامن وصف لاصفة
    دلالي بيهه انتهه لاهو الخبط لاصفة
    لا هو ميت و لا لمن تحسبه عدل
    ولاهو عافك ولاماشي بطريجك عدل
    متعافي كلبك وانه الجنت ارجه منك عدل
    تالي طلعت مشتبه وحسابي ماحاسبه
    وحسيت طبعك جفه والوفه ماحاسبه
    بزلاتك احسب وارد ارجع ادك حاسبه
    واجمع شمل فركتك وآنه انتظر وعدي لك
    يلمات كلبك ردت بيك انكتل واعدلك
    مال البخت وانتخت روحي انعدل واعدلك
    لاروحي جرت عدل لاهي بدرب لافت
    بذيالك اتعلكت والهه النظر لافت
    مشلوع كلبي يظل لاهو انكسر لافت
    وحرف اسمك اعله الصدر متعلك بزنجيل
    جنه اعله كلبي يدك وبكل وكت زنجيل
    بكل قوتي اوصفك ردت بس ماكفه الزنجيل
    ظل يخبط بدمعتي ظيم الوكت ويحل
    ويسكن مصب الدمع طرف الجفن ويحل
    لو صار دمعي بشرع حبكم مسيله يحل
    للعشك حوبه وعثر كلمن يحل حرمته
    ونعله اعله كل بت بشر عنهه الولف حرمته
    ماتنكلب لو ولف يتغازل وحرمته
    ولاتنعدل لو عفت ولفي وصرت بذات
    عاش بكياني وسكن بالروح اظن بالذات
    من دون كل هالخلك ليش آنه بس بالذات
    من صارت اخت الصدك وصلت بحدهه لحد
    وصارت عليً دنيتي بالضيك تشبه لحد
    لاني انتخيت ببشر لاشاكي حالي لحد
    صح دنيتي اصبحت لامن وسع لاسعه
    بس الهه ماهم جدم والهه بدرب لاسعه
    لونار وكتي وجمر فركاك الي لاسعه
    لجلك اطول خلك روحي القهر تسعة
    وماتيهت سجتك دام الجدم تسعة
    مو شكل واحد الي بجفاك اظن تسعة
    احلف وحك النبي والجان اله يوحي
    تاهت عليه الكلب بيك انتلف يوحي
    حاير اهلي لون جيت احضرت يوحي
    هليت بيك ولون هيج ادري ماهليت
    جي لني من عشرتك دوم الدمع هليت
    يهلال عمري انتظر شو لسه ماهليت
    هلهل عدوي ولا هلبت هلالك بشر
    ولاانته طبعك كمر لاني عرفتك بشر
    متحذر امن الوكت لن طحت بعدة بأشر
    طحت بودادك وانه البمحبتك منتلف
    وواحد تظل بالكلب ياصاحبي منته الف
    عنك تدير الوجه وك دنيتك من تلف
    وتشوف من الدمع عينك غدت ماطرة
    واسمي اعله بالك لجن بشفاك ابد ماطرة
    يابس دليلك جلد صابه العشك ماطرة
    جلمود كلبك صخر لاهم يصيبه والم
    وتوالم ويه الوكت وبنايباته ولم
    بجروح وكتي اظل استر واخيط والم
    وانته لجروحك ولا ينفعني بس مرهم


    _________________________________________

    قصيده بعنوان حبيتي غيري

    للشاعر يوليوس قيصر


    صدك حبيتي غيري ومافكرتي بيه
    وصدك كَلبه وي كلبج صارن سويه
    هم شفتي وهم وياه وهم وياه كعدتي
    هم لزم ايدج يمحبوبه.........وهم رجفتي
    هم مثلي عليه اهـــــــــواي تدللتي
    مافكرتي بيه.... شلون اعيش
    شلون امشي محنيه ركَبتي
    للاسف بانت عليه خجلتي
    شلون انام بس انا وصفنتي
    مارحمتي.....مارحمتي كَلبي الحبج وذاب بهواج!!
    وجنتي اتكوليلي انته فرحتي
    شكد عليه عليه اهواي جذبتي
    ولج حتى البطل داخ بحسرتي
    كاس ياكل كاس والمزة عبرتي
    ماحسبتي ....
    ماحسبتي اني بلياج عليل ومحد عرف علتي
    ياجمل قصيده انتي
    يمحبوبه روحي صارت بدونج غريبه
    شلون تنسيني كلبي فاديج بدم وريده
    اشلون تنسيني يا اجمل حقيقه بحياتي
    بس هسه كذوبه انتي صرتي
    يا احله حب وعشك مغزول انتي
    انتي ........انتي
    عجيبه ولج يفلانه تغيرتي
    وصرتي وهم من بعد حقيقه وشغف صرتي
    روحي الله وياج وي هذاك انتي تأقلمتي
    روحي هذا مستواج ولغيري ابد مارهمتي
    مااحبج مااريدج
    لو تلعلكيلي العشرة شمع ما ارجع لبيتج
    وكرهت اسم انثى وكرهت اسمج
    اف ما اريدج لاحبج ولا انتي
    اف ماريدج ولاحبج ولا انتي

    انتي انتي ......



    ______________________

    جمال البيك ماظنه جمال انسـان
    يالخلقــك ملاك وهيبتك اَيه
    فرهدت الحسن والناس داخت بيك
    يعني انت الحسن والنـاس شرايه
    يانشوة خمر تذهب عقول الناس
    صــافي ياخمر مابي دغش مايه
    تصفن والعيون بغيض مشدوهات
    ومصوب غضب وبراسك الغايه
    كول شماردت تلكاني طوعك دوم
    صوب ياورد تلكاني الك ثايه
    هيج احنه النحبه والنموت اعليه
    يلكانه بأمـــر للدوم فدايه
    ياشكة كمر ضيفنه عندك يوم
    ليله يا بدر واحسبنه عطايه
    فدوه لطلتك ياعزوة العشاك
    ياغنوه وقصيده وحزن فختايه
    ياراعي بمسيه ووحشة امحبين
    يعزف والحزن يتوسل بنايه
    مهضومه الليالي تريد بزغة نور
    تاهت ياحلو والناس شجايه
    ياطير الجبل عزفك يهد الحيل
    غم رايه الجزاك والف غم رايه
    .............
    للمبدع اسامه الشاعر

    ____________________________

    تكلي . . تنتقمْ مني

    وتريد إنتَ .. تأذ يني

    أنا لو أريد أنـتقم مِنــك

    عذابْ أرضي . . مَيكفيني

    وعذابَ الروح والشفتهْ

    والبكَلبي ودمعْ عيني

    أنا لو أريد أنتقم منـك

    شلعتك من دواويني

    بس أنتِ الزرعتِ الشو كْ

    وذبح دمي بسكاكيني

    وتركتيني بطر يق الموت

    واليمر يمي يعز يني

    بشماتة يقول لا تحزن ْ

    ويضحكْ من إللي مآذيني

    والعزيز أنا إللي كنت َشمعة ْ

    وحبيبك من تناديني

    وكنت أنا نبع صـافي

    مِنْ تشر بين ترويني

    ونظمت ْألشعر البقلبي

    زهور بنص ْ سنا ديني

    وزرعتْ البذرة والبذرة

    ونما زرعْ البساتين ِ

    وجت ريحْ الهجر غفله

    تدمر كل بساتيني

    وهجرتِ كل مواعيدك

    ونويتِ بس تخونيني

    وبهذاْ القرار الصار

    ردت . . ِبس تحطميني

    وردتِ .. للوفاء يموتْ

    فردْ موته .. وتدفنيني

    وجيتي اليوم تحكيلي

    (خَلْ ننسى ) .. وتنَسيني

    ونظل إخوان بسْ إحنا

    ولا تفكر تلاكيني

    بس مشي الكلامْ

    اللي أكَو له ولا تحاجيني

    ولا نظرة .. إلي تنظر

    مضىَ كل هذا يا عيني

    وإحنا أصحاب هذا اليوم

    مو بالماضي سابيني

    وأتوسل تضم حبك ْ

    ولا بسمي .. تناديني

    * *

    تقو لين . . . . اللي تقو لينه

    وبسهم حكيك تطعنيني

    وكل هذا اللي سويتيه

    وألك عين وتخابريني

    ( لاتخل القلب اسودْ )

    (وصير سبورتْ ) تسمعيني

    وخل نرجع قبل حبنا

    طر يق .. أنت تدليني

    * *

    بس أنا حلفت .. أنتِ

    بعد . . لا ما تذليني

    وصحيحَ آنا نهر طيبة

    وعجنتْ ألعشق من طيني

    وصنعتك من ضوى عيوني

    نهر يجري بشراييني

    ولو أريد أنتقم منـك

    موتك بس .. ميكفيني

    وأعو ف أرض اللي تسِكنيها

    أنتِ .. وكل دواويني

    .................... لازم

    _____________________
    قصيدة البلوى
    جبار رشيد
    بعد ما ادير ظهري
    الياهو الچان
    او وصل حد الحذر حتى اوية اخوتي
    بلوة امن احچي
    من اسكت بلوتين
    وحچي اليكره صفة رابع بلوتي
    اشتريت وادري بيهم
    ما ينفعون
    وقبل( العمله) خسران بشروتي

    ليلي العلماهم ...
    رمي الچيلات
    الحرامي منكتل كتلوا هدوتي
    مشيهم مرتبك
    يتوسل الگاع
    وانه الگاع اثبتها بخطوتي
    البعض منهم يسولف
    ما حچوا بيه
    وانه الناس يحچون بسكوتي
    ما يسكت ابد ما
    خايف اعليه
    جروح (الفقرة) انه الطلعن صوتي
    انه مهر البخت
    والعزة والطيب
    اتطشر خير عثراتي وكبوتي
    ما ذليت مره
    الدنية مطراد
    الدرب يعرف حجم دوسة (حذوتي)
    ما اصيرن اسد
    هم بيه خلل هاذ
    ذلة الصيد ال جيبه( لبوتي)
    ما دورت راحه
    وشهدوا الايام
    اول ما صرت دورت موتي
    الفاتن علي
    اعرف مشن وين
    وما نادم على الگلتلها فوتي
    (كنز )عندي ويعيش
    ولد الاولاد
    محبته الناس كل كنزي وثروتي
    الاگي الما يحبني
    بطيبة السان
    واگله العشگ بلواي وسلوتي
    مرض بيٍِ المحبة
    وخايف اعديك
    وما تستاهل انقلك عدوتي
    خيره ادلالي
    ومعلمه الفناجين
    وعلى اليكرهني ما تبخل گهوتي
    ومن احتاج قدوه
    ابعض الاشياء
    ابوي وغيره ما يصلح قدوتي
    الجمعة, 29 فبراير, 2008
    ___________________________________________________________
    اسمعني
    ((( اسمعني )))
    ارد اكتب قصيدة وكون تسمعها
    وشوف اشگد عشگ شايل بمطلعها

    القصيدة بس الك.. واخفيها عن الناس
    بس يمك اجي.. ويمك اطلعها

    اسولف بيها كلشي وما اضم اعليك
    وعلى اجفوف القوافي اسراري اوزعها

    گلبي اسرار بيه محجبة امن اسنين
    لاذب احجابها بحضنك وافرعها

    القريحة تحركت بي واجاني الهام
    وما اعرف الفكرة منين منبعها

    ارصعك بالغزل كل ضني هذا الچان
    القصيدة انوب رادت بيك راصعها

    منجم شاعرية وكلها طمعت بيك
    وشكو كلمة غزل حسنك مصنعها

    مو صدفة العرب كتبت سبع لواحات
    وردت بلثلاثة انوب تتبعها

    السبعه العلگوهن عالجدار هناك
    ملهمهن چنت جنت انت مرجعها

    وانه اليوم اجيت وحاير ابدي منين
    روحي ال.هوس حبك گلبي يدفعها

    دفنت نوحها روحي وتعنت ليك
    يبو چفوف الحرير ارحم بمدمعها

    جوعانه اشكر للعشگ صار هواي
    بلذة شوگ روحك روحي اشبعها

    گطرة مطر طاحت روحي وانت الگاع
    ترجع للغيوم اشلون تقنعها

    يالفكيت بابك لا تسد الباب
    وعلي لو مو قفل رزاتك اشلعها

    ماخسران كلشي اتصير لو متصير
    روحي بنار حبك عيشة مصرعها

    يالطبعك نحل لو عسل لو لدغات
    ياهي التصح منك ما نرجعها

    روحي معلعلة وما صدگت تلكاك
    صدگ حتى اذيتك يعني تنفعها
    نور النور نورك شاشعل الملگاك
    روحي اتحيرة يا حجة تصنعها
    اعلگلك شمع عشرة اشتضن تفيد
    اخلي اضلوعي مشعولة اوية اصابعها

    ومثل شعرة اصبحت واثنينة مجانين
    ما تگطعها بيد انه اگطعها

    لاتطلب طلب بس گلي اتمنيت
    ولك.. انه. بخدمتك عيني اشلعها

    وما ازعلك ابد ولو بالشقة اتشاقيت
    مثل بايد الخيط الدنية اگطعها

    وقبل لتمر عليه بشهر كون تكول
    حتى الگاع مدري الگاع شزرعها

    ______________________________


    عدل سابقا من قبل يوليوس قيصر في الأحد مايو 13, 2012 10:22 am عدل 1 مرات
    اميرة بغداد
    اميرة بغداد
    غريب ذهبي
    غريب ذهبي

    انثى المواضيع : 33
    تاريخ الميلاد : 02/03/1992
    تاريخ التسجيل : 30/07/2010

    اشعار شعبي عراقي جميل وحزين وغرام وخيانه Empty رد: اشعار شعبي عراقي جميل وحزين وغرام وخيانه

    مُساهمة من طرف اميرة بغداد في الأربعاء أغسطس 04, 2010 10:02 am

    موضوع جميل ورائع
    شكرا جزيلا
    تقبل مروري

      الوقت/التاريخ الآن هو الجمعة أبريل 03, 2020 5:30 am